Daha doğrusu, o anlamağa başlamışdı ki, bu dünyada məhəbbətsiz insan kimi yaşamaq və mübarizə aparmaq mümkün deyil. Sevdiyin peşə ilə məşğul olmaq hələ xoşbəxtlik demək deyilmiş. Gərək ağır günlərdə, kədərli anlarda ürəyindəkiləri bölüşməyə bir yaxın adamın olsun.
Polkovnik Qasımlı həyatda az şey görməmişdi. Hər cür hadisə ilə olduğu kimi, xəyanətlə də qarşılaşmışdı. Ancaq yenə də bu iyrənc, bu mənfur, bu dəhşətli hərəkətə, bu qorxunc sözə öyrəşə bilmirdi. Axı bu insanlar niyə bir-birlərinə xəyanət edirlər? Təkcə insanlarmı? Bəli, insanlar!