Arif olsaydım əgər mən
Sual olsaydım əgər mən, cavabım yox düşünərdim,
Xəyal olsaydım əgər mən, sənə gerçək görünərdim.
Baxış olsaydım əgər mən, baxışından üzülərdim,
Yağış olsaydım əgər mən, dodağından süzülərdim.
Qədəh olsaydım əgər mən, başacan sözlə dolardım,
Fərəh olsaydım əgər mən, saf ürəklərdə olardım.
İşıq olsaydım əgər mən, sən ola səmtə saçardım,
Uşaq olsaydım əgər mən, sənin ardınca qaçardım.
Ağıl olsaydım əgər mən sən olan yerdə itərdim,
Nağıl olsaydım əgər mən, dəli sonluqla bitərdim.
Ürək olsaydım əgər mən, bu soyuqluqda donardım,
Külək olsaydım əgər mən, sənə sakit toxunardım.
Oruc olsaydım əgər mən, səni "Ay" zənn eləyərdim,
Səni gördükdə içib su, daha iftardı deyərdim.
