Allah Bes Bâkî Heves
Pîr-i mugândan bir nefes aldım 'aceb feryâd-res;
Gördüm ki söylerdi ceres Allah bes bâkî heves…
Geçdim sivâdan ol zamân keşf oldu sırr-ı kün fe kân;
Dost ile dost oldum hemân Allah bes bâkî heves…
Buldum harîm-i vuslatı içdim şerâb-ı vahdeti;
Bilmem recâ vü minneti Allah bes bâkî heves…
Ben mest ü hayrân olmuşam sergerm ü sekrân olmuşam;
Seyyâh-ı devrân olmuşam Allah bes bâkî heves…
Ben bilmezem 'ucb u riyâ ben bilmezem hubb-i sivâ;
Birdir Hudâ birdir Hudâ Allah bes bâkî heves…
Allah vâfîdir bana Allah şâfîdir bana;
Allah kâfîdir bana Allah bes bâkî heves…
Geh fânî gâhi bâkîyem geh ehl-i 'aşka sâkîyem;
Dîdâr-ı Hakk müştâkıyem Allah bes bâkî heves…
Ben 'âşık-ı zâr olmuşam ma'şûk ile yâr olmuşam;
Müştâk-ı dîdâr olmuşam Allah bes bâkî heves…
Müştak Baba Kuddise Sırruh