Sevgim mənə qanad verdi, uçurdu,
Mən özümdən yuxarıyam, aman, hey.
Sən qəlbimdə qəlbim kimi vurmasan
Bütöv deyil, mən yarıyam, aman, hey.
Öz əlimlə möhürlənir günbəgün,
Öz əlimlə bağladığım bu düyün.
Əyləcini qeyb eləyən bir ömrün,
Qəza vuran qatarıyam, aman, hey.
Nişan aldım, mən hədəfi görmədim,
Zərər gördüm, bir yol nəfi görmədim.
Öz hissimdən o tərəfi görmədim,
Öz-özümün çəpəriyəm, aman, hey.
Sən yoxsansa... mən bir heçəm, hədərəm,
Sənin üçün bir taleyəm, qədərəm.
Sevgim qədər, məhəbbətim qədərəm,
Mən özümün inkarıyam, aman, hey.