Bir vaxt səni südəmər, cocuq bilən çoxları
-Südün acıdır-deyə bu gün səni oxlayır.
Yalnız idrak əhlinə yaraşır şərəf, ad-san,
İdrak üçün fərqi yox, cavansan, ya qocasan.
Dünya yolçuluğunda gör nə qədər yol gedən,
Bir az da ağıllıdır daldakı öndəkindən.
Okur Takip Önerileri
Nizaminin ki, düzdür xilqəti də, qəlbi də
Başa çatar, inşallah, hər işi, mətləbi də.
Haqq söz halva da olsa, haqsız üçün acıdır,
Haqq-acı, fəqət hamı həqiqət möhtacıdır.
Düzlüklə qurtularsan hər acıdan, ağrıdan,
Qoy düzlük səndən olsun, zəfərlərin Tanrıdan.
O yerdə ki, doğruluq hökm edər, bayraq açar,
Dada çatan haqq özü onun ardınca uçar.
Gül əyri olduğundan, qoynunda bitdi tikan,
Qamış şəkərə döndü düzlüyü ucbatından.
Yalnız cəhənnəmdən yox, hər istidən-soyuqdan
Səni saxlayan zireh düzlük, paklıqdır, inan.
Paklıq, təmizlik nuru bürüsəydi hər kəsi,
Kimlə, nəylə dolardı cəhənnəmin mə'dəsi?
Ey qəflət yuxusunda xoşbəxt uyuyan xumar!
Yeyən, içən eşşəkdən, öküzdən fərqinmi var?
Tamah salan varmı heç acı aslan ətinə?
Öləndə, qurd-quş belə toxunmaz cəsədinə.
Quşların qol-qüvvəti yalnız qanadlarında,
Yaltaqların qüdrəti qızıl adlı varında.
Barama qurdu kimi biri hazırlar ipək,
Biri həmin ipəyi kəsib yeyər güvətək.