Kitabın II nəşri, müəllifin I nəşrdə çap olunmayan 1 məqaləsi və 1 müsahibəsi də daxil edilərək genişləndirilib. Bu dəfə kitabın tərtibatı və keyfiyyəti daha yüksək səviyyədə hazırlanıb. Kitabda bütövlükdə 80-dən çox fəlsəfi məqalə və 4 müsahibə yer alıb. Kitabda “Fəlsəfə işığında dil”, “Kulturo-etik yazılar”, “İslamın çadrasız üzü”, “Zaman, allah-insan, ölüm”, “Siyasi-ideoloji yazılar” kimi 10-dan çox əsas başlıq yer alıb. “Aşma” sözü fəlsəfi baxımdan mənim üçün özündə transsendensiya, sintez(is) və eks-sistensiya anlayışlarını birləşdirir. Dağı, dərəni, uçurumu, pilləni, mərhələni, problemi, çətinliyi, yanlışı, halı, ideyanı, dövrü, kültürü, özünü aşmaq olar; vardan yoxa, yoxdan vara və nəhayət, metafiziki o taya (ötəyə) aşmaq olar. Aşmaq – adlamaq, arxada qoymaq, ötmək, uzaqlaşmaq, keçib getmək, öhdəsindən gəlmək, qalib gəlmək deməkdir. Aşmaq – anlamaqla olur! Aşmaq dəyişməkdir. Buna görə də, bu dəyərli söz həm “başa düşmək” anlamını, həm də “var olmaq” anlamını özündə birləşdirib daşıyır. Var olmaq – hərəkətdə, tərpənişdə, yolda olmaq deməkdir. Buna görə də aşmada dinamizm anlamı var. Böyümək özü-özünü aşmaq deməkdir. Bu kitab mənim özümün ayrı-ayrı aşmalarımdır. Uzun illərdir ki, mən bu “aşma” sözünün sehrini aşa bilmirəm. Buna görə də onu kitabımın adı kimi seçdim.
Ağalar Məmmədov
