Dünyanı qorxuya salan qanlı cəllad Adolf Hitler II Dünya Müharibəsində məğlubiyyətini dərk edərək, onu gözləyən qeyri-müəyyən və qorxulu aqibətdən xilas olmaq üçün, bəlkə də, utancından, vidan əzabından xilas olmaq üçün həyat yoldaşı ilə birlikdə bunkerlərin birində intihar edir. Bu barədə yüzlərlə versiya irəli sürülsə də, müharibədə məğlub olan faşizmin liderinin ölümü hələ də müzakirə mövzusudur. Onun intiharı və cəs-dinin yandırılması ilə bağlı bu gün də müxtəlif əfsanələr dolaşır, dünyanı qana çalxalayan Fürerin ölümü haqqında müxtəlif filmlər çəkilir, kitablar yazılır.
Hitlerin həyatı və son günləri ilə bağlı ən maraqlı, eyni zamanda, müəyyən qədər ziddiyyətli və sensasiyalı olsa da, inandırıcı mənbələrdən biri də 1934-cü ildən Fürerin sürücüsü olmuş Erix Kempkanın xatirələridir. Kempka öz xatirələrində nə qədər ifrata varsa da, təhriflərə yol versə də, uzun müddət Hitlerin yaxınında olduğu üçün yazdıqları oxucularda böyük maraq oyadır.
