Lêkolînên li ser zimanê Kurdî nîşan didin ku zimanê Kurdî, pir dewlemend e û dişêt bi awayekî baş û berfireh, hewcehiyên zimanî, di warên cuda da, mina babetên civakî, siyasî, zanistî, felsefî, qanonî, abori, hwd. bi sanahî, pêk bîne. Lê jibo vê yekê pêdiviye ku lêkolînên zanistî li ser hemû babetên zimanê Kurdî bihên kirin. Bêguman banetê lêkeran, yeke ji babetên pirgiring e. Lewma birrên jêderên lêkeran, pîvanên kişandina her birrekê di demên cuda û gora rawên cuda, bi berfirehî û bi duristî bihên naskirin. Ji bo vê armancê me pêdivî dît ku vê pirtûkê bi taybetî terxanî babetê lêkerên Kurdî bikin.
Zenginiya zimanê kurdî ji lêkeran û hêmanên din ên gotinan, ji şêwazê kişandina lêkeran û danadina hevokan diyar dibe. Ji bo ku zimanê Kurdî baştir bihête zanîn, dîtin û nivîsandin, divê ku lêkolînên zanyarî, li ser zimanê Kurdî, li hemû Kurdistanê û li hemû deverên ku Kurd tê da dijîn bihên kirin. Pêdviye ku lêkolînên berfireh, li ser axiftin, zarav û devokên herêmên cuda, heta li ser cudahiyên devokî yên xeyil û hozên kurdî bihên kirin, da ku hemo miratê zimanê me bihêt komkirin, nivîsadin û parastin. Bi vê yekê zengîniya zimanê kurdî dihêt parastin û gora pedivitiyan sud jê dihêt wergirtin.
