Sebahul xeyrî xana min
Şehê şêrîn zebana min
Tu yî ruh û rewana min
Bibit qurban te canê min
Te alellah çi zat î tu
Wî şêrîn sifat î tu
Ne wek qend û nebat î tu
Yeqîn ruh û heyat î tu
Heyat û reheta canê’m
Sebahul xeyrî ya xanim
Were bînahiya çavan
Bibînim bejn û balayê
Sebahul xeyrî mesta min
Letîfa cam bi desta min
Xumar û meyperesta min
Tu yî meqsûd û qesta min
Ji meqsûdan tu yî bes min
Bibin ber çerxê etles min
Ji xeyrî te nedît kes min
Bi reş toz in miqewwes min
Melayê Cizîrî
Rom û Ecem tev welat vegirtin
Bindest dijîn em, ji ber ku Kurd in
Çira û rewşen li me vemirtin
Ger bêne kuştin, dayê tu negrî!
Xwendin nehiştin li nav me Kurd an
Ne hiş, ne bîr man ji êş û derdan
Ev bax û bostan, ji dest xwe berdan
Ger bêne kuştin, dayê tu negrî!
Cegerxwîn
Ey dîlbera gerden zerî
Wey nazika dêm qemerî
Qamet ji mûma fenerî
Wêran ez im, malê'm xirab
Ey dîlbera qamet misal
Wey nazika dilî hejar
Te ji xwendinê kirim betal
Wêran ez im, malê'm xirab
Feqiyê Teyran
Sirra sibê li ba bû
Dara hewrê veciniqî, hişyar bû
Tevziyek da xwe, tevziyek kûr
Û rahişt bilûrê danî ser dirana
Blûr,
Ji sedsaleyên dûr
Û ji kezeba kûr stra.
Dîlbera qeşeng
Terhîn û ciwan
Li serî zerzeng
Di dest de piyan
Pêşkêşî min kir
Meyê ji lêvan
Bi vexwarin da
Kirim natiwan
Ey bilbila baxçê gulan, çira dikî şîn û gazî
Yar cem te ye, gul ba te ye, tu wek min ê belengaz î?
Belengaz im ji ezel da, heqê min e şîn û gazî
Sergerde û bê yar û dost, ne min per e ne azadî
Azadiya ger min heba, yar û welatê min heba
Ez li ser textê sema, wek te dibûm serefirazî
Serefiraz î bi perwaz î, tu aşiqê sehergaz î
Azad û hem bi dilxwaz î, ne wek min ê bênewaz î
Bênewaz û bêçare me, 'aciz û bêder mande me
Hêsîr û qeyd û bende me, bilbil ji min çi dixwazî
Bilbil çira wer dinalî, çira melûl û bêhal î?
Ji ber eşqa gula al î, yan jî wek min bêheval î?
Bêheval û bêhogir î, bextê reş û bê talî' î
Ji bo me ra ji roja ezel, xaliq wisa teqdîr kirî
Ey xaliqê kewn û mekan, rehîmê insan û him can
Carek li me rehmê bike, ma em ne mexlûqê te ne?
Rehma te bê hed û hesab, j'bo herkesê j'bo xas û 'am
Mehrûm tenê em bûn ji nav, ma qey ne em kolê te ne?
Bilbilê dilkul dinalî
Her li ser dêmên gulê
Gul çi zanî ku li ser kê
Wer dinalî bilbil e?
Pertewa dêmên sipî
Carek li dil ku ew nedît
Çend bikî qêrîn û zarîn
Kî dizanî dil kul e?
Dilgirê wek bilbilê
Herdem bi nalîn û girî
Girtiyê benda evînê
Dil li benda sunbil e.
Cegerxwîn
Hirç ketine nava rez
Gur ji hawîr têne pez
Ji xew rabin em bi lez
Ez nizanim çi bêjim
Çi ne ev êl û eşîr?
Ne beg maye ne jî mîr
Ji dijmin re bûn Cizîr
Ez nizanim çi bêjim
Şêxên bi cibe û şaş
Xwe ji olê dane paş
Hemî bûne gornebaş
Ez nizanim çi bêjim
Ey xortê ku ji nû tê!
Ê ku di nav zikê dê
Yan jî di pişta bavê
Ez nizanim çi bêjim
Ji bo we ez vê sazê
Xweş lê didim bi gazê
Bi daxwaz û niyazê
Ez nizanim çi bêjim
Cegerxwîn