n
Nef'î
1 üyeTakip
Yâ Rab kerem et bendene ihsân eyle
Düşvâr olan ahvâlimi âsân eyle
Dünyâ hevesinden koma gönlümde eser
İstersem eğer cenneti zindân eyle.
Lezzet-i vuslat için firkat-i yâri çekemem
Sohbet-i bâde için renc-i humârı çekemem
Âşinâ çıktım ise çeşmine kâfir değilim
Sitem-i gamze-i nezzâre-şümârı çekemem
Minnet eylerse felek bir-iki günlük ömre
Olurum derd-i muhabbetle o bârı çekemem
Âşıkım âşıka şûrîdelik alâ yaraşır
Pek denâet görünür siklet-i ârı çekemem
Nakd-i vakt olsa bana zevk u safâ-yı vuslat
Bir nefes ârzû-yı bûs u kenârı çekemem
Sînemi dâğ ile dil tâze gülistân ister
Bülbülüm lîk gam-ı köhne bahârı çekemem
Câna minnet ne çekersem çekeyim ey Nefî
Lezzet-i vuslat için firkat-i yâri çekemem
On sekiz bin âlemi seyr eylemek lâzım değil
Her nefesde feyz-i Hak bir özge âlemdir bana
Halk-i âlem bir nefes şâd olmağa cânlar verir
Cânımın cânânı gûyâ dildeki gamdır bana
Ey dil hele âlemde bir âdem yoğ imiş
Var ise de ehl-i dile mahrem yoğ imiş
Gam çekme hakikatde eğer ârif isen
Farz eyle ki el’ân yine âlem yoğ imiş.