Gidüp el-hamdülillah cism-i pâkinden o illetler
Zuhûr etdi sa‘âdetlerle sıhhatler selâmetler
Bi-hamdillah kederler geçdi gayri vaktidir olsun
Binişlerde safâlar zevkler dil-cûy sohbetler
Sefûf u hab yeter vakt oldu gayri ne yensin içilsin
Mürebbâlar mu‘anber kahveler pâkîze şerbetler
Adûnun bağrı şemşîr-i hasedle çâk çâk olsun
Cihanda gösterüp şevketlü hünkârım celâletler
Otursun pâdişâhım haşmet ü devletle taht üzre
Gelüp kılsın derinde Husrev ü Cemşîd hidmetler
Keder eyyâmı gam evkâtı geçdi ba‘d-ezin yâ Rab
Ziyâd olsun safâlar dâ'im olsun izz ü devletler
İlahî sana hamd olsun yine bu günleri gördük
Nice günden beri derd ile tak olmuşdu tâkatlar
Olup derd ü gam ile halk-ı âlem bî-dil ü bî-cân
Cihânı bî-şu‘ûr etmişdi mihnetler kesâfetler
Yerine geldi cânı hamdülillah rub‘-ı meskûnun
Efendim buldu sıhhat çok şükür cism-i hümâyûnun
- Nedim -