Mirvarid Dilbazi sözleri ve alıntılarını, Mirvarid Dilbazi kitap alıntılarını, Mirvarid Dilbazi en etkileyici cümleleri ve paragragları 1000Kitap'ta bulabilirsiniz.
Mənim ürəyimin qırx otağı var,
Gülləri ətirli şahlıq bağı var,
Sən bu sarayların şahzadəsisən.
İndi sənsizlikdə ey məni sevən:
Çoxdan bağlı qalıb qırx otağım da,
Solub, xəzan olub şahlıq bağım da.
Məni fikirli görsən
Demə ki, bir qəmim var.
Mən vəcd aləmindəyəm,
Əlimdə qələmim var.
Məni fikirli görsən
Demə ki, möhnətdəyəm.
Sükutuma toxunma!
Xalqımla söhbətdəyəm.
Əynimi sadə görsən
Demə kasaddır əlim.
Mənim başqa geyimim,
Bəzəyim var, gözəlim!
Süfrəmi sadə görsən,
Utanma nemətlərin
Orda az-çoxluğundan.
Sənin nə xəbərin var:
Qələm sahiblərinin
Mənəvi toxluğundan.
Karvanım yol üstədi,
Könlüm səni istədi...
Demədinmi xəstədi?
Ürək durur, can gedir,
Gedən nigaran gedir.
Ey qəlbimin sirdaşı,
Var hər yazın bir qışı,
Gözlərdə həsrət yaşı,
Ürəkdə hicran gedir.
Günəşin arxasınca
Qəmli bir karvan gedir.
Sən su olsan
Mən səni
Bir qurtumda içərdim.
Ocaq olsan
İsinərdim istinə,
Baxmazıdım alovuna,
Tüstünə.
Yağış olsan
Deyərdim: - Yağ üstümə!
Gül olsaydın
Dərib dəstə bağlardım,
Dərdiyimçün qoxlayanda ağlardım.
Zərrə olsan:
Mən səni:
Zərrələrdən seçərdim.
Sən əl çatan adi insan olsaydın
Mən yanından etinasız keçərdim.
Xatirələr ümmanında
Qərq olur gəmim.
Bu gəmiyə yüklənibdir:
Kədərim, qəmim.
Mən qərq olum,
Tək sən yaşa
Könül həmdəmim.
Mən buludam, yağış dolu –
Gəl, qoyma yağam.
Sən bilmədin, mən püskürən
Bir yanar dağam.
Həsrətimlə öz odumda
Mən yanacağam.
Məhəbbət çələngim,
Arzu güllərim
Düşdü tufanına hansı illərin.
Küləklər at çapan hansı səhrada
Boz qumlar üstünə səpələnibdir,
O hansı qayanın, dumanlı dağın
Uca zirvəsində daşa dönübdür?
Yenə oturmuşam mən tək otaqda.
Xəyalım pərişan, fikrim uzaqda.
Bir ney iniltisi,
Bir kaman səsi
Sehrinə salmışdır dərdi-ümmanı...
Arzu sahilinə yetişmək üçün
Bu qırıq gəmidə bəs avar hanı?!
Sən su olsan,
Mən səni
Bir qurtumda içərdim.
Ocaq olsan,
İsinərdim istinə,
Baxmazdım alovuna,
Tüstünə.
Yağış olsan
Deyərdim; Yağ üstümə!
Gül olsaydın,
Dərib dəstə bağlardım,
Dərdiyimçün qoxlayanda ağlardım.
Qoca çinarın kölgəsində,
Qoca ürəyin ölkəsində,
Yatan pəri qızı oyansa əgər,
Bu miskin ölkəni tərk edib gedər.
Olar bu qoca mülk bir xərabazar,
Tökər yarpağını qocaman çinar.
Ey insanlar! Burada səs salmayın,
Sazı dindirməyin,
Kaman çalmayın,
Amandır! Burada nəfəs almayın!
Ay kimi parlayıb, gün kimi yanar,
Yatmış pəri qızı birdən oyanar,
Gedər, bu qoca mülk qalar virana.
Açar qapısını soyuq küləklər...
Onu oyatmayın, dəyməyin ona,
Bu qoca ürəyi qəm-qüssə təklər.
İstəsəydim səni, səndən alardım,
Gözəlləri öz taxtından salardım.
Ürəyimi-ürəyinə calardım
Sən yanardın, mən baxardım tüstünə.
Ulduz olub öz zirvəmdən enərdim,
Dövrəndəki "mələkləri" yenərdim,
Al laləyə, qərənfilə dönərdim,
Səpilərdim yollarının üstünə.
İstəsəydim vüsalına yetərdim,
Mən gül olub ürəyində bitərdim,
Orda bülbül fəryadıyla ötərdim,
Mən yanardım, sən baxardın tüstümə.
Ölsəm, bir gün gəl qəbrimin üstünə,
Bircə dəstə bənövşə qoy, bəsimdir!
Baş üstündə bir qaranquş ötəcək,
O da sənə minnətdarlıq səsimdir.