Gərçi məhəbbət aləminin çox səfası var,
Hər qara zülfə meyl edənin min bəlası var.
Aşiq şikayət eyləməz, hər cövrə səbr edər,
Pərvanə sanma, atəşə yansa, nəvası var.
Hər aşinayə söyləmək olmaz, vəfası yox,
Çək imtahana, bəlkə, bir əhli-vəfası var.
Qoyma qədəm, diyari-məhəbbət bəlalıdır,
Nə ibtidası var, nə də ki intəhası var.
Səbr ilə gün keçirə gərək əhli-eşq olan,
Hər dərd olursa, axrı bir gün dəvası var.
Bir daşürəkli dilbərə çoxdan vurulmuşam,
Nə rəhmi var, nə dostluğu var, nə ədası var.
Şairlər içrə sanma hünərsizdi Vahidi,
Vahid nə olsa da yenə, bil iddiası var!