Farida Valiyeva
@Valiyeffa01
Bakı
Azərbaycan, 27 Ocak 2001
98 okur puanı
Mayıs 2021 tarihinde katıldı
“İtirilmiş Simvol: Sirr, Düşüncə və İnsan Şüuru”
Roman boyunca din, metafora və doqma anlayışları bir-birinə toxunur. Müəllif açıq şəkildə göstərir ki, problem inamın özündə yox, onun sorğulanmadan qəbul edilməsindədir. Simvollar burada gizlətmək üçün yox, düşündürmək üçün qoyulub.
Dan Brown bu dəfə sirri yalnız tarixdə və sənətdə deyil, həm də insan şüurunda axtarır. Kitabda Noetika Elmi ilə bağlı fikirlər diqqət çəkir: insanın düşüncəsi və ideyalarının dünyaya təsiri, onların ölçülməsi və gücü haqqında maraqlı araşdırmalar təqdim olunur. Oxucu görür ki, fikir sadəcə bir düşüncə deyil, bəzən insan həyatını və hətta dünyanı dəyişə biləcək potensiala malikdir.
Kitab boyunca simvollar, şifrələmə üsulları (Sezar şifrəsi və s.) və mistik elementlər oxucunu düşünməyə və sirrin ardınca sürüklənməyə çağırır. Xüsusilə Mysterious Hand kimi elementlər kitabın mistik atmosferini gücləndirir, sirri daha da cəlbedici edir.
Oxucu olaraq ən maraqlı olan sirrin özü deyil, ona yüklənən gözlənti və düşüncə səyahətidir. Həyəcan və maraq kitab boyunca artır, amma həqiqət çox vaxt sadədir, onu mürəkkəbləşdirən bizik. Kitab sürətli oxunur, araşdırmağa və düşünməyə sövq edir. Düşünməyi sevənlər üçün mütləq oxunması tövsiyə olunur.
Dan Brown
Dan BrownReklam
Bir kitab, bir qədər adrenalin və gözlənilməz son
"Da Vinçi Şifrəsi"ni oxumağa başlayanda açığı, bir az peşman olmuşdum. İlk 30-40 səhifən çox sıxıcı gəldi, atmaq istədim. Amma içimdə bir səs dedi ki, yarımçıq qoyma, davam et. Və yaxşı ki, davam etmişəm. Kitab irəlilədikcə adrenalin yüksəldi, hadisələr açıldıqca marağım daha da artdı. Elə gün oldu ki, gecə saat 3-də belə kitabı qapatmaq istəmədim. Özümü elə bil Sofi və Lenqdonla birgə qaçışın içində hiss edirdim.
Ən maraqlı tərəfi isə Qraal sirri ilə bağlı fərziyyələr idi. Mariya Maqdalina haqqında oxuduqlarım, İsanın nəslinin davam etməsi iddiaları, Da Vinçinin əsərlərində gizli detallar - bütün bunlar məni çox düşündürdü. Hətta kitabı oxuya-oxuya təkcə Google-a baxmadım, İncilə belə göz gəzdirdim. Sonuncu Şam Yeməyi tablosunu açıb o qadının kim olduğu ilə maraqlandım, Vitruvian insanı, fi (φ) ədədi, şifrələmə üsulları, Etbaşı, Sezar şifrəsi - hamısını araşdırdım. Kitabı sadəcə oxumadım, araşdıraraq oxudum və bu hiss mənə çox maraqlı gəldi.
Amma içimdəki əsas sual bu idi: Bütün bu ölüm, bu qədər planlar, qətllər - bunun sonu nə olacaq? Sirr nədir? Oxuduqca gözləntilərim artdı. Elə bilirdim ki, axırda dünyanı dəyişəcək bir həqiqət ortaya çıxacaq. Amma sonda anladım ki, bəzən bu qədər böyük hadisələrin, bu qədər sirrin arxasında insanın gözləntisindən daha sadə bir həqiqət dayanır.
Bəlkə də bu kitabın əsas mesajı budur: Sirrin arxasınca qaçanların çoxu elə yolda ilişib qalır. Çünki həqiqət çox zaman sadədir.
Oxumaq istəyənlərə tövsiyəm odur ki, bu kitabı oxuyanda sadəcə süjetin ardınca qaçmayın. Araşdıraraq oxusanız, özünüz üçün daha fərqli şeylər tapacaqsınız. Maraqlı və düşündürücü bir təcrübədir, oxumağa dəyər.
Dəmiryolu Uşaqları
"Dəmiryolu Uşaqları" uşaqlığın səmimiyyəti, çətinliklər qarşısında qorxmadan durma bacarığı və xeyirxahlığın insan həyatında necə böyük rol oynadığını göstərən həssas və düşündürücü bir əsərdir. Ataları gözlənilmədən həbs olunandan sonra üç uşaq – Bobbi, Peter və Fillis – anaları ilə birlikdə Londondakı rahat həyatlarını tərk edərək şəhər kənarındakı daxmaya köçürlər. Həyatları tamamilə dəyişir, lakin onlar ruhdan düşmür. Dəmiryolu stansiyası onların gündəlik həyatının bir parçasına çevrilir.
Uşaqlar daim köməyə ehtiyacı olanlara yardım etməyə çalışırlar. Onların bu saf niyyəti ətrafdakı insanlar tərəfindən də qiymətləndirilir. Stansiya rəisi, balıqçı, qoca cənab və doktor – hamısı uşaqların xeyirxahlığını hiss edib onlara dəstək olur. Bu personajların hər biri bir mesaj verir: insan nə qədər çətinlik içində olsa da, yaxşılıq etməkdən vaz keçməməlidir və bir gün həmin yaxşılıq geri dönəcək.
Əsərin emosional tərəfləri ilə yanaşı, diqqət çəkən bir məqam da var. Kitabın arxa üzərində belə bir cümlə qeyd olunub: “Ağıllarına da gəlmir ki, qatardan onlara əl eləyən atalarının yox olmasına bais olan şəxsdir.” Mən əsəri başdan sona oxudum və bu fikrə uyğun gələn konkret səhnə açıq şəkildə göstərilmədi. Bəlkə də bu cümlə oxucu marağını artırmaq üçün əlavə olunub, çünki müəllif bu məlumatı uşaqlara və oxucuya dolayısı ilə, üstüörtülü çatdırır. Yəni açıq süjet detalı şəklində yox, daha çox simvolik bir ipucu olaraq.
Nəticə olaraq, "Dəmiryolu Uşaqları" saf duyğularla yazılmış, həm uşaqlar, həm də böyüklər üçün dəyərli mesajlar daşıyan gözəl bir əsərdir. Uşaqların sadə, amma güclü xeyirxahlığı və onları anlayan böyük insanların davranışları bu kitabı oxucuya həm hüzur, həm də dərin düşüncə bəxş edən unudulmaz bir təcrübəyə çevirir.
Cənab LeytenantŞəhidlərimizi unutmayaq!
Real həyatdan götürülmüş kitablar insanın həyatında, duyğularında daha fərqli yer tutur. Oxuduğumuz kitabdakı qəhrəman xəyal məhsulu deyil, həqiqətən, yaşamış bir insan olduqda, onun yaşadıqları kədərli və sevincli xatirələri insan özü yaşayırmış kimi dərindən hiss edə bilir. Kitabda yaşanılan duyğular o qədər ustalıqla təsvir olunub ki, oxuduqca insan duyğularına, bəzən göz yaşlarına hakim ola bilmir. Baş qəhrəmanımız, həqiqətən də, bir qəhrəman olmuş olduqda isə, bu duyğular daha qabarıq şəkildə yaşanır. Bəli, bizim kitabımızın qəhrəmanı Şəhid Leytenant Teymur Abbaslıdır, təkcə, oxuduğumuz kitabın deyil, bütün Azərbaycan Xalqının ölməz qəhrəmanlarından biridir. Kitabda müharibənin ilk günlərində könüllü, özü də yaşı çox olduğu üçün təkidlə cəbhəyə yollanan 40 yaşlı Teymurun Füzulinin və Xocavəndin azadlığı uğrunda gedən döyüşlərdə iştirakından rəğbətlə bəhs edilib. O, şəxsi igidliyinə görə ölümündən sonra “Vətən uğrunda”, “Füzulinin azad olunmasına görə” və “Döyüşdə fərqlənməyə görə” medalları ilə təltif edilib.
Şəhidlərimiz haqqında yazılmış hər yazı müqəddəsdir, bizim üçün. Biz hər birimiz Azərbaycan vətəndaşı olaraq, Şəhidlərimizi tanımalı və tanıtmalıyıq. Və Cənab Leytenant kitabı da bizə ölməz qəhrəmanlarımızdan birini də tanımaq, tanıtmaq üçün kömək edir. Şəhidlər ən ali qürur mənbəyimizdir. Kitabın son səhifəsində də yazıldığı kimi:
Biz bir gün olmayacağıq, amma, Sən, daha uzaq bir gələcəkdə hələ də yaşayacaqsan, Cənab Leytenant!
Cənab Leytenant 
Əli Rzazadə
Cənab Leytenant Əli RzazadəAzəri Rəqqasəsi Yerevanda1000 Kitap
Əvvəlcə, kitab haqqında ümumi məlumat verəcəm.
Kitab müəllifin seçilmiş əsərlərindən ibarətdir və buraya "Azəri rəqqasəsi Almaz Baxşəli Yerevanda”, "SPİD-ə yoluxmiş Anjela Petrosyan Bakıda (bioterror)”, Qədim Bakının (1924 cü il) kriminal oçerkləri, "Quldur Bakı” barədə qədim tarixi yazılar, "Stalinin Bakıdakı (1908-ci il)sərgüzəştləri”, "Qadağan olunmuş müsahibələr” və bu kimi maraqlı hekayələr və materiallar daxil edilib.
Kitab Bakı və Qafkazdakı kriminal aləminin XIX əsrin sonundan son vaxtlara qədər ardıcıl alqoritmini tam şəkildə əks etdirir.
Əsas onu bildirmək istəyirəm ki, bu kitabda baş verən hadisələr hər biri real həyatda olan hadisələrdir. Faktlar və sənədlər əsasında yazılmış bu kitab demək olar ki, bir çox qaranlıq məqamları işıqlandırır. Kitabda erməni həbsxanasında əsir olan azərbaycanlıların yazdığı məktubları oxuduqca, insanların çarəsizliyini duyduqca, insan məhv olur.
Kitabda həyat ilə, din ilə, Tanrı ilə bağlı yazılmış fikirlər xüsusilə insanı düşünməyə, sorğulamağa vadar edir. Hər kəsə tövsiyə edirəm, xoş oxumalar.
Reklam