Gözlədim yolunu həsrət içində, Tükəndi taqətim, neçin gəlmədin? Şəhdi-vüsalından üzüldü əlim, Ey dilbər afətim neçin gəlmədin?
Əlimdəki qələm bir sədəfli saz, Nə qədər səninçün çoşar, yorulmaz! Aramızda olan zəncir qırılmaz, Ey sözüm-söhbətim, neçin gəlmədin?
Gözlədim yolunu, hava qaraldı, Bu qaranlıq hava ruhumu sardı. Səndən qəmgin könül sevinc umardı, Sən ey səadətim, neçin gəlmədin?