İstəsən
sükuta bürünsün cahan.
heç nə yox,
al məndən gülüşlərini...
Al məndən ömrümlə
əbədi qalan
o ani,
o ani
Görüşlərini.
İstəsən, qoy olsun!
Nə danış, nə din!
Al indi o əziz günləri məndən,
İstəsən, bir sabah mənə verdiyin
Sədaqət andını
al geri, məndən!
İstəsən, al məndən
düşəndə kölgə,
Yaşıl meşələrin pıçıltısını.
Bizimçin darıxan
sahillə birgə,
Al məndən dənizin parıltısını.
Fəqət soyuq baxma,
sən gendən, gözəl!
Sənsiz
günəşsizdir
Bu göy, bu torpaq,
hər şeyi,
hər şeyi,
Al məndən, gözəl!
Təkcə ümid qalsın
qoy məndə ancaq.
Ümid-
bir dünyalıq sükut içində
Bir dünyaya dəyən
gülüşlərindir.
Ümid --
bir şimşəkdir
bulud içində,
O ani,
əbədi
görüşlərindir.