Keskesora hembêza te
Piştî barana bêrîkirinê..
Ez nizanim
Zivistan e
An ez li ser ewrên sînga te
Dijîm?
Gelo di kîjan
Birînê de
Emê bigihine hevdû?
Çima çavên te biriqandina
Stêrkan didizin?
Bayê evînê porê min
Tev dida
An tiliyên te bûn?
Tenê
Çavên te
Min ji kûraniya windabûnê
Vedigerînin
Şev hemû bendewarên
Hatina te ne
Tu bi xwedêkî
Were
Buhar bû
Kulîlkan lêvên te bi ramûsanan
So dikirin
Kenekî xwedayî li ser
dîlan dikir
Were
Bi min re helbestê
Binivîs
"Bila helbest me binivîse"
Şev birîndar in bi gûleyên
Bêxewiya min
"Tu razayî Mehabad"
Ji kenekî sotî li ser
Herdu lêvên te re
Ez bejnên gotinên xwe
Ditewînim