Kanunısani 1331 / Rebiülevvel 1334
On beş günde bir çıkar asker ve muharebeden bahs eder risale-i musavvere
Sayfalar 50-64
Balkan Muharebesi memleketimizde haşr-ı mesaib ederken, efkar ve inzardaki ihtilaf ve tereddüd kafi değilmiş gibi, ortaya vakitsiz, lüzumsuz, münasebetsiz bir mesele daha atılmışdı: Tali‘-i harbin Bulgar hududunu İstanbul’a fevkalade takrib etmiş olması güya bu beldeyi ani bir istilanın tehdid-i daimisi önünde bulunduruyormuş, ve bu musibetin tehaddüs-i nagihanisinden tevakki için payitahtı Anadolunun içeri taraflarına nakl etmek zaruri imiş!…
Ben bu kil u kali o vakit hüzn ve istikrah ile telekki edenler meyanında idim. İsterdim ki bir sahib-i hamiyyet meydana çıkarak sesinin her kabiliyet-i feryadıyla eğer İstanbul tehlikede ise payitahtı değil, hududu öteye kaldırmak vazife-i milliyemizdir! desin. Ve umumun muvacehe-i delaletde bir kıyamet takbîh koparsın!..