Leman İslam
@lemanisl
high-functioning sociopath
Şu anda okuduğu kitap
İnsanlar yalandan özlərini elə göstərirlər ki, sanki fədakarlıq edirlər, lakin belə bir şey, bu sözün adi mənasında mövcud deyil və heç vaxt da mövcud olmayıb. İnsan çox vaxt səmimi olaraq inanır ki, o, yalnız başqa birinin naminə fədakarlıq edir, lakin bu, özünü aldatmadır; onları öz təbiətlərinin və təhsil səviyyələrinin tələblərini təmin etmək hərəkətə gətirir, bununla da ruhi-mənəvi rahatlıq tapırlar.
Ana Adəmin paltarında gəzəcək, təki balasını geyindirsin; çağasını yedizdirmək üçün ac qalacaq; körpəsini əzablardan qurtarmaq üçün məşəqqətlərə dözəcək; hətta körpə yaşasın deyə öləcək. Onun həyatının zövqü və həzzi məhz bu fədakarlıqlardan ibarətdir. Ana bunları həmin bu mükafat - bu özünütəqdir, bu zövq, bu aləm və bu rahatlıq üçün edir. Əgər eyni ödənişi ala bilsəydi, o, bütün bunları sənin övladın üçün də edərdi.
İnsan hər necə olursa-olsun, bu cür yaradılıb və bütün bunlara görə irsi genlərinin, böyüdüyü yaşayış yerinin, ünsiyyət dairəsinin, qruplarda və cəmiyyətdəki əlaqələrinin ona göstərdiyi nüfuza və təsirə borcludur. Onu xarici təsirlər - və yalnız onlar - hərəkətə gətirir, istiqamətləndirir, əmrlər verir. İnsan özü heç nəyi doğurmur, yaratmır, hətta fikirləri belə.
İnsan beyni elə qurulub ki, hər hansı bir fikri doğura bilməz. Onun qisməti xaricdən əldə edilmiş xammalı istifadə etməkdir. O, cəmli-cümlətanı iradəyə tabe olmayan, avtomatik işləyən maşındır. O, özünə ağalıq etmir, onun sahibi onun üzərində hökmran deyil.
