Loriyek diherikî di şevê de
qêrînek xwe radipêça li deşta Baraké
bayekî mizgînî dibir ji dilên winda re
xêzek din diyar bûbû di eniya
Dayika Uveyş de
mizgîniya pêşin bû ew qêrîn
tirêjê destpêkê yê rojên bi hevî bû
zayîna pêşin a sterka hezkirinê
û tirsa pêşin a rûqilêrên Nemrûdan bû..
"Lori lori berxê min lori..."
Pimê bêrîkirinên bêdawi
tên kişandin
stranek datîne ser pêta agir
navê wê azadî
ji Mazlûm, Zekiye, Ronahi
û Bêrîvanan re hatî diyarkirin
Evîn dibin stran
ji rojên asûde re
dişewite hemû çûyîn
tenêtî
metirsî
û bêdengiyên me
dibin xwelî
di wê rojê de
di Newrozê de
Newroza dilagir
rengê azadiya gelê Kurd
her roj geştir dibe agir
her roj nêzîktir dibe azadî...
Roj tên mijandin
di kenê te de
behr tên razandin
rûheyva welatê min
keçika serê çiya
wêneya serfiraziya min e kenê te
wêneyê hêviyê
wêneyê hesretê
dilovaniyê
ev kenê jiyanê ye
azadî dikene
û mirin dimire.
Asoyek sor e Dêrsim
asoyeke ku pêşerojê difikire
li ser eniya asoyê biskeke şil e Mûzûr
mîna keziyên Besê
di navenda Dêrsimê de
tewl dide xwe diçe
Hêstirên çavê Dêrsimê ye Mûnzûr
Mirinê tu bimre erê
mirinê
tu bimire
erê
hê çîrokên pîra min hebûn
wê ji zarokan re bigotana
dengê diya min diricifi di telefonê
de ji gund lez û bez hatibû
Tu ne tenê li ciwanan
tu li kal û pîran jî nayî
tu bimire, erê mirin
3 Kewçêr 2015
Ji bo bîranîna bavê min ê eziz Mela Seleheddin
Bawko
Çimê min birêje ber min bawko
eger ku min tu ji bîr kiribe...
Diçim ber ava hinaran tu yî li wir ber pez
ber mêşên hingivî ber rezê serê kaniyê tu yî li wir bawko...
Çavê xwe dadidim te dibînim
ça te bîr kim...
Hêsrên çimê diya min de tu diherikî bawko
Wek lehiyan Bawko
Ça te bîr kin
Bê te bijîn, ça?..
Piştî tu çûyî
tirî şîrîn nabe
gul bin nadin
Bawko...
23 Gulan 2001
Me dişopîne çavên Ceylanê
çiqas sal di ser re derbas bibin jî.
Dibe ku wê topa hawanê fihêt kiribe
yên ew çêkirî
yên ew avêti
û yên li hemberî avêtina wê
bêdeng mayîn
fihêt nekiribin jî...
2018