Gözlərim buz tutub, baxışım soyuq,
Sözlərim uyuşmur söz sırasına...
Qəlbim əsir düşüb özgə əllərə,
Kirpiyim göz yaşı sırsırasına...
Vaxtım yollarında qurban kəsilib
Saat əqrəbindən asılıb dilim.
Sənin ürəyində hansı fəsildi?
O fəsilə uyğun geyinib gəlim...
Sən məndən...
Mən isə özümdən uzaq -
Vaxtdan irəliyik, baxtdan geriyik...
Bizə fəsillər də, aylar da yasaq,
Oğurluq anların sakinləriyik.