Nicat Shukurlu
@Kayranicat
Diqqət cəlb etməyin, bədənlərində oyanan şəhvət tərkibli şirin duyğuların, qəribə, anlaşılmayan hisslərin üstünü pərdələməyin ən yayılmış üsulları qızların saçlarından dartmaq, çimdikləmək, itələmək, ağızlarında yuvarladıqları kağız toplarını qələmin gövdəsinə yerləşdirib qızların üzünə füləmək, onlara müxtəlif ləqəblər qoşmaq idi. Hətta bir dəfə, Mirzə adlı oğlan Səidənin xatirə dəftərindəki “Xatirə üçün bir rəsm çəkin” hissəsinə ereksiya vəziyyətində olan penis şəkli çəkmişdi. Rəssamlıqda istedadı olmayan Mirzənin çəkdiyi əyri-üyrü, deformasiyaya uğramış penisin ucundan isə qırıq-qırıq nəsə fışqırırdı. Çox güman ki, Mirzə çəkdiyi rəsmdə sperma ifrazını təsvir etmək istəmiş, amma əvəzində prostatı iltihablanmış adamın əzablı işəməsi alınmışdı.
Reklam
Qızların bu həyatda hər şeydən utanmaq üzrə proqramlaşdırıldığını; abır, ismət, həya kimi anlayışları cəmiyyətin yalnız onlara şamil etdiyini Səidə o dövrdə aydın başa düşmüşdü. Qızlar bütün hisslərini içlərində boğarkən, oğlanlar arxa partalarda tərbiyəsiz söhbətlər edir, bəziləri isə əndazəni aşıb masturbasiya ilə məşğul olur, bir-birlərinə göstərdikləri alətlərinin ölçüləri ilə lovğalanırdılar. Səidə birinci dəfə masturbasiya haqqında eşidəndə, hətta bir kərə tənəffüs vaxtı sinfə girib, təsadüfən bu mənzərəyə şahid olanda ürəyi bulanmış, qulaqlarının dibinə qədər qızarmışdı. Eyni hissləri o, küçədə itlərin ya da pişiklərin cinsi əlaqəsinə şahid olanda da keçirirdi.
Sonra oğlanların bığları cücərməyə başlayırdı. Onlar bığları ilə fəxr etsələr də, qızların çoxu dodaqların üstündəki bu seyrək tüklərin oğlanları gülməli göstərdiyini hesab edir, bir az cəsarətli qızlar isə yenicə cücərmiş bığlarla məzələnərək, oğlanlardan “məməş” zarafatlarının qisasını alırdılar.
Səidə oğlanların qızlardan bir qədər gec dəyişməyə başladığını da bilirdi. Qızların sinələri tədricən qabardığı halda, oğlanlardakı dəyişiklik nədənsə ani baş verirdi. Dünən əsəb pozucu səslə civildyən oğlan, bu gün kobud səs tembri ilə bütün sinfi təəccübləndirir, dostlarının gülüş obyektinə çevrilirdi. Bir az gec, bir az tez - özləri də eyni hormonal metamorfozun güdazına gedəndə, bu dəfə ələ salınmaq növbəsi onlara çatırdı.
Səidə, “qadınlığa” ondan əvvəl qədəm qoymuş sinifidəki gözüaçıq, çoxbilmiş qızlarla da bu haqda çox danışmışdı. Tənəffüslərdə sinfin, ya da dəhlizin bir küncünə toplaşan qızlar gülüşə-gülüşə, qızara-qızara qadın vücudunun anatomiyası haqda bildiklərini bir-birləri ilə bölüşür, bu məlumat mübadiləsi nəticəsində bəkarət pərdəsi və onun toya qədər zədələnməməsinin vacibliyi, klitor, orqazm, hətta penis haqda biliklərə yiyələnirdilər. Əslində qızların “maariflənmə” prosesi ilə, oğlanların cinsi həyata dair öz aralarında etdiyi şit söhbətlər mahiyyətcə fərqlənmirdi. Yeganə fərq oydu ki, oğlanlar “beldən aşağı” mövzular haqda daha sərbəst danışır, nəzəri biliklərini məktəbə gətirib bir-birlərinə nümayiş etdirdikləri “əyani vəsaitlər” - porno şəkillərlə möhkəmlədirdilər. Qızlar isə oğlanlar qədər açıq-saçıq ola bilmədiklərinə görə onlara həsəd aparır, maskulin cəmiyyətin oyun qaydalarını əxz edirdilər.
Reklam