Nicat Shukurlu
@Kayranicat
Qəribədir ki, saqqız çeynəyə-çeynəyə, xayalarını qaşıya-qaşıya ağzına gələni danışan siyafur oğlanların yerli-yersiz təkliflərindən, atmacalarından zara gələn, daim diqqət mərkəzində olmaqdan bezən qızlar onlara fikir verməyən oğlan azlığının varlığı ilə heç cür barışa bilmir, belələrinin diqqətini cəlb etməkdən ötrü öz aralarında yarışır, nəticə əldə edilmədikdə isə depressiyaya düşürdülər. Bəzi inadkar qızlar isə “öldü var, döndü yoxdur” düsturuna sadiq qalaraq, diqqət çəkmək üçün qəribə hərəkətlərə yol verir – onları iqnor edən oğlanların ayaqlarını tapdalayır, üstlərinə aşır, yeməkxanada icazə almadan gəlib qarşılarında oturur, mənasız suallar verib danışdırmağa çalışırdılar.
Reklam
Diqqət cəlb etməyin, bədənlərində oyanan şəhvət tərkibli şirin duyğuların, qəribə, anlaşılmayan hisslərin üstünü pərdələməyin ən yayılmış üsulları qızların saçlarından dartmaq, çimdikləmək, itələmək, ağızlarında yuvarladıqları kağız toplarını qələmin gövdəsinə yerləşdirib qızların üzünə füləmək, onlara müxtəlif ləqəblər qoşmaq idi. Hətta bir dəfə, Mirzə adlı oğlan Səidənin xatirə dəftərindəki “Xatirə üçün bir rəsm çəkin” hissəsinə ereksiya vəziyyətində olan penis şəkli çəkmişdi. Rəssamlıqda istedadı olmayan Mirzənin çəkdiyi əyri-üyrü, deformasiyaya uğramış penisin ucundan isə qırıq-qırıq nəsə fışqırırdı. Çox güman ki, Mirzə çəkdiyi rəsmdə sperma ifrazını təsvir etmək istəmiş, amma əvəzində prostatı iltihablanmış adamın əzablı işəməsi alınmışdı.
Qızların bu həyatda hər şeydən utanmaq üzrə proqramlaşdırıldığını; abır, ismət, həya kimi anlayışları cəmiyyətin yalnız onlara şamil etdiyini Səidə o dövrdə aydın başa düşmüşdü. Qızlar bütün hisslərini içlərində boğarkən, oğlanlar arxa partalarda tərbiyəsiz söhbətlər edir, bəziləri isə əndazəni aşıb masturbasiya ilə məşğul olur, bir-birlərinə göstərdikləri alətlərinin ölçüləri ilə lovğalanırdılar. Səidə birinci dəfə masturbasiya haqqında eşidəndə, hətta bir kərə tənəffüs vaxtı sinfə girib, təsadüfən bu mənzərəyə şahid olanda ürəyi bulanmış, qulaqlarının dibinə qədər qızarmışdı. Eyni hissləri o, küçədə itlərin ya da pişiklərin cinsi əlaqəsinə şahid olanda da keçirirdi.
Sonra oğlanların bığları cücərməyə başlayırdı. Onlar bığları ilə fəxr etsələr də, qızların çoxu dodaqların üstündəki bu seyrək tüklərin oğlanları gülməli göstərdiyini hesab edir, bir az cəsarətli qızlar isə yenicə cücərmiş bığlarla məzələnərək, oğlanlardan “məməş” zarafatlarının qisasını alırdılar.
Reklam