Stalin öz yaxın silahdaşlarını yanına yığıb deyir:
- Bax, siz baş sındırırsınız ki, xalqı necə idarə edəsiniz, necə edəsiniz ki, mən kirpik çalanda, hamı kirpik çalsın, mən gözümü yumanda hamı gözünü yumsun, hamı mənə tanrı kimi baxsın. Yaxşı deyiblər çar tanrı deyil, ancaq ondan da əskik deyil.
Stalin diri toyuq gətirilməsini əmr edir.
Toyuğu son lələyinəcən diri-diri yolur, zavallının bircə pipiyi və başının şanası qalır.
- “İndi isə baxın” - deyib lüt toyuğu yerə buraxır. Hamı gözləyir ki, toyuq baş götürüb qaçacaq, ancaq hara qaçsın- günün altında istidən bişir, kölgədə üşüyür, buna görə də Stalinin çəkmələrinə qısılır.
Stalin gedə-gedə təkəm-seyrək dən səpir, toyuq da onun ardınca gedir, başa düşür ki, getməsə acından öləcək, ütülmüş vəziyyətdə özünə yem tapa bilməyəcək.
Stalin deyir:
- Baxın, xalqı məhz belə idarə etmək lazımdır!
SSRİ liderləri ilə bağlı zamanında xeyli lətifə və əhvalatlar uydurulmuş, xalqın dilinə düşmüşdü. Bu da növbəti, reallığı qismən əks etdirən bir əhvalat.