Azərbaycan mentalitetinin təməlində illər, hətta nəsillər boyu basdırılmış, ört-basdır edilmiş, üzəri qalın, ancaq təməli əsassız "əxlaq" pərdəsi ilə örtülmüş erotik hisslər, arzular, həyata keçirilə bilməyən cinsi istəklər, ehtiraslar dayanır. Bunun fərqinə hər gün daha çox, daha dərindən varıram. Təəssüflər olsun ki, bu zəhər tuluğunu öz qəlbində sahib olduğu ən dəyərli şey kimi daşıyan yaxınlarım, qohumlarım çox ali şəkildə təcəssüm etdirirlər. Onlar üçün dəyər sadəcə ömür boyu hansısa kişiyə rəsmi dövlət sənədləri əsasında təsdiqlənmiş və hər kəs tərəfindən qəbul edilmiş, "bu belə olmalıdır, doğru olan budur" prinsipi ilə arvadlıq, daha doğrusu fahişəlik etməyimdir. Sevdiyim, uğrunda mübarizə apardığım, ideyalarımı, arzularımı, xəyallarımı ən xırda fürsətdə kiçik və mənasız görən ( qəribə olan budur ki, onların mənasız görüşləri bu istəkləri daha mənalı edir) bu cəmiyyətin təməlsiz təməl daşları hər zaman var və var olacaq. Seçim isə bizimdir, ya bu daşların üzərinə basaraq, irəliyə, daha iradəli və daha əzmli şəkildə addımlayacağıq, ya da onlar kimi, onlardan daha betər, hissiz, qəlbsiz bir qaya, daş parçasına çevrilib, həyata keçirə bilmədiyimiz ehtirasların içərisində boğulub öz zəhərimizi, xəstəliyimizi başqalarına da yoluxduracağıq.