Ganîdür ışk ile gönlüm ne mâlüm ne menâlüm var
Ne vasl-ı yâra handânam ne hicrândan melâlüm var
Ne sağ olmak murâdumdur ne ölmekden kaçar cânum
Cihânda haste-i ışk olalı bir hoşça hâlüm var
Ne meyl-i külbe-i ahzân ne seyr-i sohbet-i yârân
Ne ta’n-ı zâhid-i nâdân ne ceng ü ne cidâlüm var
Ben ol hayrân-ı ışkam kim yitürdüm akl u idrâki
Ne âlemden haberdâram ne kendümden hayâlüm var
Cihân fânîdür ey Yahyâ Hüve’l-Hayyu Hüve’l-Bâkî
Değişmem atlas-ı çarha benüm bir köhne şâlum var