Orxan Bahadırsoy:
Atəşindən alışıb,
soyuğundan donmuşam.
Mən hər şeyə başlanğıc,
təkcə sənə sonmuşam.
Bahar Zamanova:
Sənsiz cəhənnəm idi
Yerim yurdum yatağım
Tanrı "yandırın" dedi
Baxıb gördü yanmışam.
Orxan Bahadırsoy:
Hər yerdə yuva hördüm,
vətən olmadı, gördüm!
Dur, qapını aç, ömrüm,
eyvanına qonmuşam!
Bahar Zamanova:
Yazı qışa döndərən
Quzeyimdən gün dərən
Qapımı açıb girən
Gölgəni sən sanmışam
Orxan Bahadırsoy:
Dərdimi bəlli etdim,
min cür təsəlli etdim.
Getdim, təməlli getdim,
yenə sənə dönmüşəm.
Bahar Zamanova:
Kim gedib, kim gözləyib
Kim qalıb, kim dözməyib
Səndən nağıl istəyib
Mən mənə aldanmışam
Orxan Bahadırsoy:
Boş ver o nağılları,
bir dəfə bax, gör barı...
Mən üzü sənə sarı
səcdədə dayanmışam.
Bahar Zamanova:
Mən həm qış, mən həm bahar
Mən həm yoxam, həm də var
Mən gizli, mən aşikar
Tək sənə əyanmışam.
Orxan Bahadırsoy:
Dodağımda sükutsan,
əllərimdə qunutsan.
Ölərəm, e, unutsan,
mən sənə inanmışam.
Bahar Zamanova:
Nə yük qalıb boynunda
Ay əlləri qoynunda
Mən həyat oyununda
Ölümlə sınanmışam
Orxan Bahadırsoy:
Başımda dəli sevda,
əcəb ölməli sevda!
Ömrün əvvəli sevda,
axırı hicranmışam!
Bahar Zamanova:
Qupquruca nəfəsdim,
Unutmadığın səsdim,
Həsrəti qurban kəsdim
Mən əlləri qanmışam.
Orxan Bahadırsoy:
Başı bəlalı yarım,
yerim, yurdum, diyarım!
Yarım qalmışdım yarım,
gəldin tamamlanmışam!
Bahar Zamanova:
Dənizə dönən göləm
Məcnun gəzdiyi çöləm
Sən həm ağam, həm köləm
Mən xan qızı xanmışam.
Orxan Bahadırsoy:
Şeirin Sultanısan,
ürəyimin Xanısan.
Sən Bahar Zamanısan,
mən quru Orxanmışam. :)
Bahar Zamanova:
Kədər kədər üzüldüm
Əllərinə düzüldüm.
Bir söz dedin çözüldüm
Bu qədər asanmışam
Orxan Bahadırsoy:
Ey əvvəlim, axırım,
izim, yolum, cığırım,
Bax, əllərim yuxarı
qarşında dayanmışam.