Hitler kimdir? Çoxumuz elə düşünə bilərik ki, Hitlerin kim olduğunu yaxşı bilirik. Ancaq ilk baxışda belədir. İndiyədək oxuduğumuz kitablardan, saysız-hesabsız qəzet-jurnal məqalələrindən, baxdığımız filmlərdən biz yalnız Hitlerin yürütdüyü irqçilik siyasətini, bu idbar siyasətin qurbanı olan milyonlarla günahsız insanın taleyini, onun Avropa ölkələrini zəbt etməsini və əlbəttə, SSRİ-yə qarşı müharibəni öyrənmişik. Fürerin əsl təbiəti, daxili dünyası, intim həyatı, dini inancı kimi məsələlər isə hələ də sirr olaraq qalır. Bu sirri hətta Nürnberq prosesi də aça bilmədi.
Məşhur fransız yazıçısı, tarixçi və publisist, gizli ezoterik elmlərlə məşğul olan Fransua Ribado Düma oxuculara Adolf Hitlerin şəxsiyyətinin indiyədək aşkar olunmamış bir tərəfini təqdim edir. Bəşər tarixinin ən qaniçən diktatorunun həyatını doğulduğu gündən öldüyü günədək izləyən müəllif nasistlərin arxivlərindən tapılmış tam məxfi sənədləri, adlarını bildirmək istəməyən şahidlərin dediklərini, Hitlerin yaxın məsləkdaşlarının gündəlik və memuarlarını, eləcə də şəxsən özünün apardığı araşdırmaları əsas tutaraq, oxucunu sözün əsl mənasında şoka salan, tayı-bərabəri olmayan sənədli bioqrafiyanı təqdim edir. O, sübut edir ki, alman xalqının, eləcə də bir çox başqa xalqların pərəstiş etdiyi, ərəblərin, ümumən müsəlmanların Məhəmməd peyğəmbərdən sonra “ikinci müqəddəs insan” saydığı, “Göydə Allahdır, yerdə Hitler” deyib səcdə etdiyi III Reyx kansleri adi adam yox, Tule gizli satanist sektasının üzvü imiş. O, qara cadu ilə məşğul olan, bütün qərarlarını ətrafına topladığı məşhur cadugərlərin məsləhəti ilə qəbul edən, daim şər ruhlarla əlaqədə olan, Tanrını inkar edib ruhunu şeytana satmış qorxunc bir insan olub.
Sadə dillə yazılan, ilk səhifəsindən sonadək birnəfəsə oxunan, yalnız və yalnız ciddi tarixi sənədlər və canlı şahidlərin dedikləri üzərində qurulan bu misilsiz əsər Hitleri oxucuya tam başqa prizmadan göstərir. Bu əsəri oxuyandan sonra heç kim nə İkinci Dünya müharibəsinə, nə də bu dəhşətin müəllifi olan Hitlerə əvvəlki gözlə baxmayacaq.
