1 Sende bu 'işve girişme derd-nâk eyler beni
Vehmim ol mecnûn 'aşka iştirâk eyler beni
2 Zîr-i fesden heft-ser ejder gibi idüp gulüvv
Zülfün ey şûh-ı gül-endâm vehm-nâk eyler beni
3 Çeşm-i cellâdınla seyf-i kaşın almış araya
N'ola ey meh kim günâhım çâk çâk eyler beni
4 Sen ne hâcet kasd-ı cân itmek bana ey derd ü gam
Ârzû-yı vuslat-ı cânân helâk eyler beni
5 Rûhî'ye besdir bu lutfun günde dâgım tazele
İstemem özge vefâ cevrin helâk eyler beni
1 Var iken nûr-ı dîdem tarz-ı tarâvet sende
Tab'-ı âşüfteye taklîd-i ri'âyet sende
2 Sana maḥbûb-ı zamân dir iken üftâdelerin
Ne revâdır kim ola zenne kıyâfet sende
3 Seni zen dostı çeker halvete şâyed hazer it
Var iken cilve-i nisvâna 'alâmet sende
4 O revişler kırılışlar o tebessüm nâzlar
Ne ola fahişe etvâr-ı u hâlet sende
5 Ne kırarsın suhan âgâza gelince gerdân
Duhtere şâmil olan hâsa halâvet sende
6 Biz edâ eyledik elzem yine hidmetleri hep
Şimdi ey sâhib-'atâ kaldı 'inâyet sende
7 Var ise her ne kadar ehl-i dilin menfûrı Ta'ne-i 'âlem olan bid'at-i 'âdet sende
8 Sen mücâvir iken ol kubbe-i sîm altında
Eksik olmaz güzelim ehl-i ziyâret sende
9 Rûhîyâ bir kız edâlı şûha itmek nazarı
Şart-ı 'aşkda yog imiş eyle ferâgat sende
1 Gönülde nakş olan cânâna ben de olmuşam bende
Güzellerde 'ulüvv-i şâna ben de olmuşam bende
2 Âristo arz kılına hâcetim bak gayrı eczâya
Devâ-yı derd ider Lokmân' a ben de olmuşam bende
3 Züleyhâ'nın taşını dergeh-i şah eyleyüp âhir
Melâhat mülk-i Mısr akrâna ben de olmuşam bende
4 Tarîk-i 'aşk içinde her bir 'âşık bendelik tutmuş
Cihânda misli yok bir cânâ ben de olmuşam bende
5 Ne mümkin terk kılmak Rûhî bâr-ı 'aşk-ı düşvârın
Rehinde cân virüp merdâne ben de olmuşam bende