Başımız əziyyət çəkərək daha çox pul qazanıb ətrafdakıların gözünə soxmağa, daha yaxşı geyim, daha müasir maşın, daha dəbdəbəli ev, daha mükəmməl smart cihazlar əldə eləməyə elə qarışıb ki, özümüzü tamamilə unutmuşuq.
Gözəl bir dünya yaratdı, amma bir şey nəzərindən qaçdı – yaratdığı məxluqlara özünüdərk bacarığını verməyi vacib bilmədi. Və bu nəzərdən qaçmış xırdalığa görə yaratdığı gözəl dünya heç bir əhəmiyyət daşımayan nəhəng topdan başqa bir şey ola bilmədi. Özlərinin ən ağıllı varlıq olduğunu iddia edən insanlar belə heç bir zaman həyatın nəbzini tuta bilmədilər.
Əgər kiminsə kiçik bir ağrısı varsa onu hiss eləməməyin, ya da unutmağın ən yaxşı yolu daha böyük bir ağrıdı. Daha böyük yaraların yanında kiçik yaralar gözə dəymir.
-Arada o uşaqlıqdan çıxsan yaxşı olardı. Bax, yeni bir dünyaya açıl. 2022 gözəl, 2023 yeni texnologiya, hər şey yenilənir və zaman sürətlə irəliləyir, sən isə həmişə geri addımlayıb qalmısan.
- Sən hansı yeni dünyanı nəzərdə tutursan? Yeni dünya hər gün bir-birini öldürən insanlarla dolu olanımı deyirsən? Ya da robotlaşdırılmış, sinirləri şişirdilmiş şar kimi olan; toxunsan partlayar. Bir-birinin ətini yeməyə hazır qaşqabaqlı insanlarla dolu olanmı? Yəni bunları nəzərdə tutursansa, keçmişimdən çox razıyam.