İnsan özünü dərketmə həddinə çatdıqda görür ki, xeyir və şər qəhrəmanları bir-birilə çarpışırlar, ucalıqla alçaqlığın mübarizəsi şiddətlə davam etməkdədir və əksərən şərlə alçaqlıq xeyirlə ucalıq üzərində qələbə çalır. Əlbəttə ki, həssas vicdan və ürək sahibi olan bəşər üçün xeyir qəhrəmanının məğlubiyyəti qəbuledilməzdir. Belə olduqda, bütün təbiətdə ədaləti açıq-aşkar olan adil Allaha inam hissi tələb edir ki, xeyirlə şərin mükafatı və cəzası olsun və insan ömrünün qısalığına, bu dünyaya sığmadığına görə həmin mükafat və cəza başqa bir dünyada öz sahibini tapsın.
Gerçəkliklərə diqqət yetirdikdə aydın olur ki, varlıq dünyası bütün fəsilləri bir-birilə həmahəng olan bir kitaba və ya bütün sözləri bir-biriylə qırılmaz əlaqədə olan cümləyə bənzəyir.