Onun gözü Firuzənin qol saatına sataşdı. Çox qəribədir, kasıb adamlar qol saatından daha çox istifadə edirdi. Bunu Kərəm öz müşahidələrindən bilirdi. Elə bil, kasıblar daim hansısa bir vaxtı gözləyirlərmiş. Amma varlıların saata o qədər ehtiyacı olmurdu. Onlar, əksinə, saatdan uzaq olurdular. Çünki saat onları ölümə yaxınlaşdırır, arzularına yox - arzulara onlar çoxdan çatıblar. İndi tələsəsi heç nə yoxdur. Təki zaman dayansın, ölüm geciksin. Bəlkə də ona görə varlılar antik şeyləri sevir, divarlardan zamana qalib gəlmiş ölməz rəsm əsərləri asırdılar.