Sîne-i 'aşkda sırr-ı la'l-i cânân gizlemiş
Kân-ı ebdân içre ol kim cevher-i cân gizlemiş
Dilde şol 'âşık ki sırr-ı 'aşkuñ itmişdür nihân
Gûşe-i vîrânede genc-i firâvân gizlemiş
Dilde mihr-i hâtem-i lâ'lüñ nihân itmiş rakîb
Div işitdük bir zamân mühr-i Süleymân gizlemiş
Sîne çok seyr itdük ey dil var ise ol sîm-ber
Sihr ile koynında kurs-ı mâh-ı tâbân gizlemiş
Bir sadefdür dürr-i evsâfuñla dîvânum benüm
'Ârif almuş koynına mânend-i ummân gizlemiş
Hattınuñ pîrûzesin buldı çıkardı bâd-ı subh
Zîr-i dâmânında ol zülf-i perîşân gizlemiş
Biñ hicâb-ı kibriyâ ardında göstermez yüzin
Kendüyi gözlerden ol sultân-ı hûbân gizlemiş
Hep nezâhir üzre zâhir çeşm-i nâzırdan nihân
Kendi envâernda kendin mihr-i rahşân gizlemiş
Nükte-i lâl-i revân-bahş ile ey Bâkî yine
Zulmet-âbâd-ı midâruñ Âb-ı hayvân gizlemiş