Həyatın hər üzü mənə tanışdır,
Sanki varlıq mənəm, bu həyat mənəm.
Heç bir şey ruhuma yad olmamışdır.
Qəmdə sevinc gəzən, nəşələrdə qəm
Duyğular yurdudur mənim bu sinəm.
Mən elə ağlaram − göz yaşlarımdan
Quruyan otlar da göyərər, bitər.
Göylərin leysanlı yağışlarından,
Yerlərin selindən, suyundan betər
Axar göz yaşlarım, axar sərasər.
Mən elə gülərəm − təbəssümümdən
Əriyib tökülər quzey qarı da.
Dağılar dağları tutan duman, çən,
Əriyər dağların dağ vüqarı da,
Əriyər günəşin şüaları da.
Mən elə sevərəm – məhəbbətimi
Bölsən bəs eləyər bütün bəşərə.
Elə kin bəslərəm – ədavətimi
Töksən daşqın düşər bəhri-Xəzərə,
Mənim nifrətimdən yanar dağ-dərə.
Desələr qış günü ollam gül-çiçək,
Yayda görərlər ki, yağan qar mənəm.
Dörd fəsli özündə yaşadan ürək
Bilir bu aləmdə hər nə var – mənəm,
Duyğular, istəklər, arzular mənəm!
Sayfa 305