Bir busə alıb şövq ilə canan dodağından,
Sandım ki, gəlir canıma min can dodağından.
Yüz arif ola, ağzının əsrarını bilməz,
Gövhər saçılır hər yana mərcan dodağından.
Gül qönçəsinin ətri gəlir hər açılanda,
Al rəngli şəfəqlər kimi əlvan dodağından.
Hicran gününün xəstəsiyəm, vəslə yetəndə
Könlüm tapacaq dərdinə dərman dodağından.
Yüz şövq ilə Mir Mehdi verər canını qurban,
Yar versə əgər lütf ilə fərman dodağından.