Virür insâna hayât-ı tâze
Nağme-i bülbül ü hoş âvâze
Gûş kıl nağmesini insânuñ
İktizâ eyler ise insânuñ
Komaz âyîne-i hâtırda gubâr
Nağme-i çeng ü ney ü mûsikâr
Nağme-i şûh-ı hoş-âheng-i beşer
Hâh u nâ-hâh ider insâna eser
Nağme bir mantık-ı rûhânîdür
Nağmenüñ lezzeti vicdânidür
Cân-fezâdur nefes-i insânî
Dil-rübâdur nağam-ı rûhânî
Hâne-i câna virür nûr-ı sürûr
Neş’e-i nağme-i târ u tanbûr
Nüsha-i şavka dîger şîrâze
Târdan sâdır olan âvâze