136 syf.
·
Puan vermedi
·
67 günde okudu
"...bütün bunların tək bir insanın əlindən və ruhundan çıxdığını düşünəndə başa düşdü ki, insan məhv etməkdən başqa şeylərdə də Allah qədər istedadlı ola bilər."
Okur Takip Önerileri
Bir axşam taksidən düşüb payıza,
Bilmədik haraya, hayana gedək,
Dərin sularını qatıb dayaza,
Dəniz də bağlandı yay kinosutək.
Yağışın əlindən qaçıb bir küncə,
Dayandıq üzümüz qibləyə sarı
Yenə tapılmadı, payız gəlincə
Bağlı ümidlərin itmiş açarı...
(1964)
Mən sağ ikən
kəsilsə qağayıların səsi,
silinsə qayaların kölgəsi...
yox olsa Xəzər,
Mən sağ ikən barmağımdan üzük kimi ömrümdən Xəzər çıxsa,
Xəzər itsə...
Neyləyərəm,
neyləyərəm dəniz də getsə...
(1964)
Ölümümə bir az qalmış
Darayacağam saçlarımı,
Təmiz, ağ köynək geyəcəm,
Ölümümə bir az qalmış.
Ölümümə bir az qalmış
Göy üzü mavi olacaq,
Buludlar köpük-köpük.
Məktub yazacağam sənə.
Sevirdim, sevirəm, sevəcəyəm deyəcəm,
Ölümümə bir az qalmış,
Ölümümə bir az qalmış...
Son gecədir bu gün yenə,
Sabah yenə son səhər,
Son yel dolur son yelkənə,
Qayıq üzür birtəhər...
Axırıncı ağacdır bu,
Əsir sonuncu külək,
Bağlayıb sonuncu yolu
Yenə sonuncu fələk...
...Öləndə neçə yaşın var idi sənin?
Yoxsa hələ doğulmamışdın?
(1963)
Min yerdən dənizə
gəmilər çıxır, ay ana,
Ürəyim darıxır.
Bilirəm, ay ana,
ürəyim bilir,
tapılmır bu müdhiş
dənizdə itən.
Bir qayıq da belə keçmir ömürdən...
(1963)
Qoxun
Bakıya gedən qatarın
vaqonlar arası get-gəlində əridi,
Bakı vağzalında gözlərini unutdum,
taksiyə minərkən dodaqlarını.
Evimizin astanasında sağ əlin,
Otağımda sol əlin yox oldu...
Lakin
o siqaret tüstüsünü,
stula atdığın
sarı paltarın əziyini,
bir-birimizə dediyimiz
özgənin anlamayacağı sözləri,
o sözlərin səssiz qüssəsini
unuda bilmirəm,
unuda bilmirəm...
(1964)
Neçə ildir
iki eynək şüşəsi durur
dünyayla gözlərimin arasında.
Eynək şüşəsi ola biləydim
Beş-on duman gözlü adama...
(1965)