Bunu deyim ki Elxan Elatlının oxuduğum ilk kitabı idi. Sonuncu olacağını da düşünmürəm. Bir insanın acı taleyi... Daha doğrusu öz taleyini qumara qoyması, edilmiş sadə bir səhvin bütün həyatını mənfi istiqamətə dəyişməsi.. Dövrünün çətinliyində yaşaya biləcəyi ən yaxşı həyatlardan birini yaşayan bu şəxs.. Firdovsi. Hələ də bu adı eşidəndə qəribə hisslər yaşayıram. Amma hansı Firdovsi? kənd məktəbində ən ağıllı uşaq olan Firdovsi? Bakıya oxumağa gələn tələbə Firdovsi? Sadə kənd müəllimi Firdovsi? Bakıda daş yonan, bənnalıq edən Firdovsi? Torpaq uğrunda könüllü döyüşən qəhrəman Firdovsi? Uzun illər həbsxanada məhkum yaşayan Firdovsi? Nəhayət, kimi kimsəsi olmayan sadəcə bir binadan qarşıdakına baxan Firdovsi? Sanki bu həyatlar ayrı ayrı insanlara aid idi ancaq ad eyni idi - Firdovsi. Həqiqətən bu qədər hadisəni bir həyata sıxışdırıb yaşamaq olarmı? Tam səmimiyyətlə deyirəm ki çox təsirləndim romandan. Hadisələrin uyğunluğu, oxuduqca gələn oxuma həvəsi, bitməməsini istəməyən hisslər. Bunların hamısını yaşadıb bu kitabda. Bunu da qeyd edim ki detektiv süjetdə olsa da insanın öz taleyində daşıdığı rol, məhəbbət və Tanrıya münasibət mövzuları ön plana çəkilib. Qətiyyən oxumağınızı tövsiyə edirəm! Təşəkkürlər...
