- Bu dünyada baş verən bütün işlərdə şeytanın barmağı var, - Marten dedi, - ola bilsin, o hər yerdə olduğu kimi, elə mənim içimdə də var; boynuma alıram, bizim bu yer yumrusunda baş verən işlərə göz yetirdikcə birdən mənə elə gəlir ki, Tanrı ondan əlini üzüb, buraları hansısa yamanlıq törədən bir varlığa bağışlamışdır; sözsüz, təkcə Eldoradodan başqa. Bu uzun ömrümdə qonşuluqdakı şəhərin yox olmasını istəməyən bir şəhər, qonşusunu yox eləməyə çalışmayan bir adam görə bilmədim. Hara baxırsansa, gücsüzlərin qolugüclüləri görməyə gözü yoxdur, ancaq yenə də onların qarşısında sürünürlər, qolugüclülər isə onlarla lap ətindən, yunundan yararlandıqları qoyun sürüsü kimi davranırlar. Milyonlarla başkəsən alay (polk) adı altında bölüşdürülərək, bütün Avropanın bu başından vurub o başından çıxır, onlar insanları öldürərək, quldurluq, soyğunçuluq edərək, öz qarınlarını doyurmaq üçün çörək qazanırlar, bunun başlıca səbəbi isə onlara bundan başqa bir sənət öyrədilməməsidir. Dolanışığın yüngül olduğu sanılan, elmin, incəsənətin çiçəkləndiyi şəhərlərə baxsanız, orada barış içində yaşadığı deyilən daha çox insanın öldüyünü görəcəksiniz, burada hökm sürən bir-birini gözügötürməzlikdən doğan didişmələr, dözülməz qayğılar, həyatı bürüyən qarğaşalar, basırıqlar savaş olmadan belə minlərlə insanı vaxtsız o dünyaya aparır. İnsanın öz içində çəkdiyi gizli qüssə onun üzbəüz qaldığı ictimai fəlakətlərdən daha amansızdır..