İnsanların cinayətkara necə çevrilmələrini düşünüb tapa bilirəm. Tapıram və ürəyimin dərinliyində anlayıram onları. Əlbəttə, həmişə də cəzalarına çatırlar onlar! Ancaq insanların bir-birinə xəyanət etməsini indiyədək anlaya bilmirəm. Sən necə düşünürsən, Nuranə? İnsanlar niyə xəyanət edirlər?
Bilirsən, Nuranə, hamı insandır. Cinayətin qurbanı olan da, cinayətkar özü də! Gərək başa düşməyə çalışasan, necə oldu ki, bu adam gəlib cinayətkar oldu. Axı, heç vaxt doğum evindən cinayətkar çıxarmırlar!?
Ola bilsin nə vaxtsa, kimsə onlara xəyanət edəcəkdi. Ya, kim bilir, bəlkə də onlar özləri kiməsə xəyanət edəcəkdilər. İndi isə sakitcə yatırdılar. Hər şeydən xəbərsiz. Bəlkə də onlar heç bilmirdilər ki, dünyada xəyanət adlı bir şey var. Ancaq biləcəkdilər...Mütləq biləcəkdilər!