çi rind a na şewe
Asmên herekîno verara erdî
çi weş ê nê astereyî
Erd herekîno verara asmênî
Rengî reqeşînê
Royî deyîran vanê
Tu çîyêk cayê xo de nîyo
Tu çîyêk bêreng nîyo
Her çî asî yo
Her çi qîrayîş de yo
Camerdîya to leşa mi de
Cinîyîya mi leşa to de
çi weş eşq beno zergûn
Axx na bêkesîye
Na bêkesîya min û to
Na bêkesîya şaîre
Na gejîya fîrarîye
Erd lal
Asmên lal
Bêkesîya ma zirçayiş der a
Yew pele nêlewina
Yew dilopa nêherikîna
La ma tarûmar bîme na bêkesîye de
Porê mi vayê na bêkesîye de vila beno
Tel bi tel viran maneno
Sêneyê to yo bêkes de bêedebê destê mi
Sêneyê to yo bêkes de asîyê lewê mi
Zerrîya ma tena na bêkesîye de sixlet
Lawikê ma tena na bêkesîye de biveng ê
Axx na bêkesîye
Na bêkesîya min û to
Wa tim wina bêkes
Wa tim wina yê ma bimano
Ez to rê mektuban nusena
Yew şaristano vîndîbîyaye ra
Yew ziwano lal ra
Ez to rê mektuban nusena
Destanê Zarîfe de mawzer
Sêne de Alîşer
Ez to rê mektuban nusena
Koyanê welatî de adir
çekuyanê bêziwanan de eşq…
Tîje bena berze hewt koyan ser de
Peyê hewt beranê asinênan de
Hewt merdimê bêhewnî deyîran vanê
Hewt zerrî girpenê
Hewt waştî jîvenê hewnan de
Hewt teyrê bêperrî asmên de çerexînê
Tîje bena berze hewt koyan ser de
û destê mi
Destê mi benê berz surelayê tîje de
Destanê mi de hewt toximê hinare
Hewt hesirî herekînê çimanê mi ra
çimê mi bêkes manenê
Zerrîya xo bi şewan bixemelne
Ez yena
Ez bi şefeqan yena…
şo!
şo xo yew helbeste de binimne
şo behran birişne rêzan ser
Hesiran…
Ez yena
Ez rêça hesiranê to de yena
Ez yena şewanê to…