En Yeni Bedrîye Topaç İletileri
En Yeni Bedrîye Topaç iletilerini, en yeni Bedrîye Topaç okur görüşlerini 1000Kitap'ta bulabilirsiniz.
Rengê Eşqî
çi rind a na şewe
Asmên herekîno verara erdî
çi weş ê nê astereyî
Erd herekîno verara asmênî
Rengî reqeşînê
Royî deyîran vanê
Tu çîyêk cayê xo de nîyo
Tu çîyêk bêreng nîyo
Her çî asî yo
Her çi qîrayîş de yo
Camerdîya to leşa mi de
Cinîyîya mi leşa to de
çi weş eşq beno zergûn
Bedrîye Topaç
Neqşê Ma Tarî Yo
Neqşê rengan o tarî
Neqşê qederê ma
Hurdî-hurdî gineno çixiranê rîyê ma ro
Neqşê rêça ma yo tarî
Neqşê ruhê ma
Giran-giran gêreno şewanê ma de
Neqşê lewanê ma yo tarî
Neqşê şerabê sûrî
Honik-honik herekîno reyanê ma de
Bedrîye Topaç
Firar
Zerrîya xo bi şewan bixemelne
Ez yena
Ez bi şefeqan yena…
şo!
şo xo yew helbeste de binimne
şo behran birişne rêzan ser
Hesiran…
Ez yena
Ez rêça hesiranê to de yena
Ez yena şewanê to…
Bedrîye Topaç
Estanika Hewtî
Tîje bena berze hewt koyan ser de
Peyê hewt beranê asinênan de
Hewt merdimê bêhewnî deyîran vanê
Hewt zerrî girpenê
Hewt waştî jîvenê hewnan de
Hewt teyrê bêperrî asmên de çerexînê
Tîje bena berze hewt koyan ser de
û destê mi
Destê mi benê berz surelayê tîje de
Destanê mi de hewt toximê hinare
Hewt hesirî herekînê çimanê mi ra
çimê mi bêkes manenê
Bedrîye Topaç
Eşq Bêziwan O
Asmên de aşme
Rîyê erdî de ez
Rîyê erdî de sewda
Sewdaya min a sûrela
Qîrîya min a lale veng dana
Veng dana daristanan
Veng dana awe
Veng dana aşme
Çekuyê Bezuwanî
Ez to rê mektuban nusena
Yew şaristano vîndîbîyaye ra
Yew ziwano lal ra
Ez to rê mektuban nusena
Destanê Zarîfe de mawzer
Sêne de Alîşer
Ez to rê mektuban nusena
Koyanê welatî de adir
çekuyanê bêziwanan de eşq…
Bedrîye Topaç