Mən səni unuda bilmirəm, axı
Unutsam nələri unudam gərək
Göylərə baxmışıq aylı gecədə
Unutsam göyləri unudam gərək!
Dənizi unudum, ya dalğaları?
Xatirən yadımdan çıxaydı barı
Payızda xəzanı, qışdasa qarı
Baharda gülləri unudam gərək.
De, necə unudum mən səni, necə?
Sevgi durna deyil payızda köçə
Yuxuma gəlirsən mənim hər gecə
Ayları, illəri unudam gərək!
Sənin xəyalındır həsrətlə baxan
Adındır hər saat qarşıma çıxan
Qarışıb şəklinə gözümdən axan
Yağışı, selləri unudam gərək!
Sinəmdə peşiman ürəyim qaldı
Uçdun əllərimdə lələyin qaldı
Nələri itirdim, bax nəyim qaldı
Nələri, nələri unudam gərək
Mən bulaq tək quruyub,
Sən gül kimi solaydın,
Gərək ya mən öləydim,
Ya sən dəli olaydın…
O sevgi yuxu idi,
Gərək ayrılmayaydıq.
Biz elə görüşmüşdük,
Belə ayrılmayaydıq.
Görən, kim gecikibdi?
Görən, kim tələsibdi?
Vüqarımız dağ olub,
Yolumuzu kəsibdi.
Yalanınla ömrümdə
Ömrü boyu qalansan.
Nə mən yaddan çıxanam,
Nə sən unudulansan.