Bir ümid yoxdur ki, onəlli tutam,
Yuxum da gəlmir ki, doyunca yatam,
Hardasan, ay anam,
Hardasan, atam?!
- Alın bu kədərin əlindən məni...
Laldı bu kədərim ağlamır, gülmür,
Dərd verir, verdiyi dərd nədi bilmir,
Niyə gecələrin səhəri gəlmir?!
- Alın bu kədərin əlindən məni...
Nə biləydik bu sevginin sonu yox,
Nə biləydik dünya belə dönəcək.
Nə biləydik sevgi adlı bu qonaq
İkimizin aramızda öləcək...
Yuxu gördük... gah qorxulu, gah da şən,
Boğdu bizi tərəddüdlər axarı.
Yuxularda əllər gördük birləşən,
Nə yozduqsa hicran oldu axırı...
Nə biləydik bu sevginin sonu yox,
Nə biləydik dünya belə dönəcək.
Nə biləydik sevgi adlı bu qonaq
Üzümüzə baxa-baxa öləcək...
Oxunmamış bir roman,
Yazılmamış əsərsən.
Nə qədər çox sevərsən,
O qədər tez küsərsən.
Küsməyini sevirəm,
Bir də utanmağını.
Gözünün qarasını,
Yanağının ağını.
Başını çiynimə qoy,
Saçlarına toxunum.
Ətrinlə bihuş elə,
Mənim kitab qoxulum..
Hələ qəlbimizdə xatirə izi,
Hələ ayrılığın nəmlidir gözü,
Hələ ki sevirik bir-birimizi,
Başqa birisini sevə bilməzsən.
Gör neçə nəğmənin bəstəsi qalıb,
Bu ocaq sönübsə, tüstüsü qalıb,
Əlində əlimin istisi qalıb,
Başqa birisini sevə bilməzsən.
İncidib, qəlbimə dəyə bilmirsən,
Yolunu bir yolluq əyə bilmirsən,
Mənə "yox" sözünü deyə bilmirsən,
Başqa birisini sevə bilməzsən.
İl keçir, ömürdə xatirə qalır,
Bahar güllərimiz qönçədə solur,
Hələ ki gözlərin məni axtarır,
Başqa birisini sevə bilməzsən.
Axar gözümüzün yaşı qurumaz,
Deyirdik bu ilqar, peyman pozulmaz,
Belə sevə-sevə ayrılıq olmaz,
Başqa birisini sevə bilməzsən.