Rəmzkar alim Əyyub Yusifov Nadir şahın hakimiyyət tarixinin gizlinlərini üzə çıxarmaq niyyətindədir... Bütün rəmzlər Ordubadda yerləşən Came məscidinə aparıb çıxarır. Müəmmanı aşkar etməyə çalışan Əyyub Yusifov Naxçıvana-Ordubada yola düşür.
Tarixi hadisələrdə həmişə şou axtaran gənc tarixçi Kərim Xalıqovun səfərə gedərkən taksidə yandırılmasından sonra bir-birinin ardınca qəribə hadisələr baş verir.
Operativ şöbənin əməkdaşı Leylanın atası Yaqub kişi isə can üstədir. Ölüm ayağında qızı üçün qeyri-adi işarələr cızır. Bundan sonra Leyla köhnə dostu, rəmzkar alim Əyyub Yusifovdan kömək istəyir. Məlum olur ki, Yaqub kişinin cızdıqları işarələr deyil, birbaşa rəmzlərdir və onlar I Şah Abbas Səfəviyə gedib çıxır.
Rəmzləri akademik Səfərbəyli ilə müzakirə edən Əyyub, İrana yola düşməyə hazırlaşır, lakin daha sonra vəziyyət dəyişir, nəzərlər qədim Azərbaycan şəhəri olan Ordubadda cəmlənir.
