Bir ömrdə iki dünya müharibəsinin şahidi olan Erix Maria Remark Almaniya, eləcə də dünya ədəbiyyatı tarixində müharibə mövzusunun yazıçısı kimi yadda qalmışdır. Bu əsərin əsas mərkəzində də Birinci Dünya Müharibəsindən sonra mühacirlərin həyatı təsvir olunur. Mühacir həyatının təsviri ilə yanaşı istedadlı cərrah Ravik və aktrisa Joanın arasındakı sevgi macərası insanı dərindən təsirləndirir. Müəllif həyat, müharibə, sevgi haqqındakı fikirlərini Ravikin dilindən bizə çatdırır.
Əsərdəki Joan Madu obrazı almaniyalı aktrisa Marlen Ditrixin prototipidir. Remark və Marlen bir müddət eşq macərası yaşadıqdan sonra ayrılmışdılar. Remark isə bütün hissələrini, acısını bu əsərdə ifadə edib.
Əsərdə daha çox obrazların xarakter və emosiyaları qabardılır. Hər bir obraz, fərqi yoxdur, əsas və ya ikinci planda olan obrazlar, o qədər reallığa uyğun təsvir olunmuşdur ki, onlara laqeyd qalmaq mümkün deyildir.
Əsərdə o qədər möhtəşəm dialoqlar var ki, insanı dərindən təsirləndirir. Və oxuduqdan sonra saatlarla boşluğa baxdıracaq bir əsər...