Qadın xəyali aləmdə olduqca böyük önəm daşıyır, gerçək həyatda isə tamamilə lazımsızdır. Poeziyanı sətir-sətir işğal edib, lakin tarixdə adı yoxdur. Ədəbiyyatda krallara, fatehlərə hökm edir, lakin gerçək həyatda ailəsi barmağına zorla üzük taxır, hansısa cavan oğlanın köləsinə çevrilir. Ədəbiyyatda dodağından ən təsirli sözlər, ən dərin fikirlər süzülür, lakin həqiqət budur ki, yazını üzündən oxuya bilmir və ərinin mülkiyyətindən başqa bir şey deyil...
Bir il ərzində qadınlar haqda neçə kitab yazılır, təxmininiz varmı?! Bəs bunlardan neçəsi kişilər tərəfindən yazılır, bilirsiniz? Bəlkə də kainatda ən çox müzakirə edilən canlı olduğunuzu bilirsinizmi?
Niyə Samuel Batler "Müdrik kişilər qadınlar haqda düşündüklərini heç zaman dilə gətirmirlər" deyirdi? Görünür, müdrik kişilər heç vaxt gərəyindən artıq nəsə demirlər.
Bəzi müdriklər qadınları dəyaz, bəziləri isə dərin hesab edir. Höte onları göylərə ucaldırdı, Mussolini onlara nifrət edirdi. Görünür, kişilər hər zaman bu mövzu barədə düşünüb, baş sındırıblar və fikirləri həmişə fərqli olub.