Məndən soruşdular, rəssam olsaydın,
Nələr düşünərdin, nələr çəkərdin?
Dedim ki kədərli, qəmli üzləri,
Hər zaman sevincli, gülər çəkərdim.
Mən rəssam olsaydım ac- susuzları,
Bari rəsimlərdə yad elǝyǝrdim.
Kimsəsiz uşağın göz yaşın silib,
Qəlbini ovudub şad elǝyǝrdim.
Mən rəssam olsaydım o qanlı yerə,
Kərbəla çölünə bulaq çəkərdim.
Bəlkə də təsəllim olacaq deyə,
Hər kəsi o suya qonaq edərdim.
Mən rəssam olsaydım ata-anamın,
Saçının ağ telin qara çəkərdim.
Onları almağa gələn əcəlin,
Əllərin bağlayıb, dara çəkərdim.
Mən rəssam olsaydım öz əsərimdə,
Dünyanı zülümsüz təsvir edərdim.
Hər kəsi mehriban, hər kəsi хоşbəxt,
İnsanı ölümsüz təsvir edərdim.
Müəllif: Ziya Fədai
Mərhəmət duyğusu səndə yoxdursa,
Tutduğun orucun nə mənası var?
Süfrəndə yoxsula yerin yoxdursa,
Bir ay ac qalmağın nə mənası var?
Tərəzin çəkidə əyri çəkirsə,
Dilin zəhər kimi qəlb incidirsə,
Əlin rüşvət alıb, rüşvət verirsə,
Qıldığın namazın nə mənası var?
Haram pullar ilə villa tikənlər,
Yetimin haqqını bölüb yeyənlər,
Şər atıb birini bədbəxt edənlər,
Öləndə YASİNin nə mənası var?
Namaz da, oruc da asandır, qardaş.
Vicdanlı olmaqsa, çətindir, qardaş.
Əsil insan olmaq lazımdır, qardaş.
Əməlsiz Quranın nə mənası var?