Varalım kûy-i dilaraya gönül hu diyerek
Kokalım güllerini gonce-i hoşbu diyerek
Şerbet-i lâli hayali bizi öldürdü medet
Gidelim kûyine yârin bir içim su diyerek.
Doğan Kitap
Her çiçeğin bir mevsimi, her kitabın bir zamanı vardır. Haziranın tadını yeni hikâyelerle çıkarın.
........... BAKMAKDAN
1 Ferâgat eylemez gönlüm rûh-ı dildâra bakmakdan
Ferâgat mı ider bülbül olan gülzâra bakmakdan
2 Perîşân-hâl olurmış ol melek-manzar beni görse
Tabîb olan niçün i'râz ider bimâra bakmakdan
3 Rakîb-ile o gün yüzlü nigâr görmesem tan' mı
Meseldür göz kamaşur dirler ilde kara bakmakdan
4 Harîm-i Ka'be-i kûy-ı habîbin gel safâsın gör
Ne feth olur sana sûfî kurı dîvâra bakmakdan
5 Cihândan cândan geçdi gönül bu râh-ı 'ışk içre
Ölürse geçmez iy sûfî cemâl-i yâra bakmakdan
6 Şehã bir tût-i gûyâ-durur şekker-şiken gönlüm
Ferâgat mi ider âyîne-i ruhsâra bakmakdan
7 Sıyâmî zülf-i dil-berden perîşân olsa dil tan' mı
Meseldür tıfl olan elbetde korkar kara bakmakdan
........ İSTEMEM
1 Bende-i Mevlâ-yı 'ışkam mülk-i hakân istemem
Meskenet damânını bek tutdum unvân istemem
2 Bir fenâ-fi'llâh Rum abdalıyam iy merd-i pâk
'İzzet-i ahbâb-ıla ikrâm-ı yaran istemem
3 Bülbülâsâ iy lebi gonca cihân bağında ben
Kûy-ı dil-ber var-iken geşt-i gülisitân istemem
4 Germ-i mihnet dil-figâr itse beni Eyyübvâr
İy tabîbüm ben hele ol derde dermân istemem
........ İSTEMEZ
Hem-dem-i kûy-ı seg-i dildâr yârân istemez
'Izzet ü kadr ü berât u örf ü 'ünvân istemez
Bir gice mihmân olan kûy-ı mugâna dostum
Kasr-ı 'âlemde mukarrer tâk-ı eyvân istemez
Sen şeh-i hûbâna hem-ser olalı ali-cenâb
Yüzine bakmaz mehün mihr-i dırahşãn istemez
İy Mesîhâ cur'a-i la'lün senün nûş eyleyen
Adın anmaz sükkerun hîç âb-ı hayvân istemez
Dîde-i nemnâkden cûş eyleyen hün-âbumı
Bir nazar gören Sıyâmî seyr-i 'ummân istemez
“Sakın terk-i edebden kûy-ı mahbûb-ı Hudâdır bu
Nazargâh-ı ilâhidir Makâm-ı Mustafa’dır bu”
