Bəxtiyar Vahabzadənin Anım günü.
.
Dəyərli Azərbaycan şairi Bəxtiyar Vahabzadə 16 avqust 1925-ci ildə Şəki şəhərində anadan olmuşdur. Hələ kiçik yaşlarında,1934-cü ildə ailəsi ilə birgə Bakı şəhərinə köçmüşdür. Burada orta məktəbi bitirdikdən sonra Azərbaycan Dövlət Universitetində 1942-1947 illərdə Filologiya fakultəsində təhsil almışdır. Bədii yaradıcılığa 1943-cü ildə ilk şeiri “Ana və Şəkil” şeirini çap etdirməklə başlamışdır. 1960-2003 illəri arasında qələmə aldığı “İkinci səs”, “Vicdan”, “Yağışdan sonra”, “Yollara iz düşür”, “Fəryad”, “Hara gedir bu dünya?”, “Özümüzü kəsən qılınc”, “Cəzasız günah”, “Rəqabət”, “Dar ağacı” kimi pyesləri Azərbaycan Dövlət Akademik Milli Dram teatrında tamaşaya qoyulmuşdur. O həmçinin tənqidçi ədəbiyyatşünas olaraq fəaliyyət göstərmişdir. Bəxtiyar Vahabzadə Azərbaycan Yazıçılar İttifaqının idarə heyətinin və Ağsaqqallar Şurasının üzvü idi. Şair “Qırmızı Əmək bayrağı” və “İstiqlal” ordenləri, Azərbaycan Dövlət Mükafatı ilə təltif olunmuşdur. Yaradıcılığının möhtəşəm əsərlərindən biri olan “Gülüstan” poemasına 1958-ci ildə həyat vermişdir. Birbaşa Sovet İttifaqını ittiham edən əsərlərini Sovet İttifaqı dağıldıqdan sonra “Sandıqdan səslər” adıyla çap etdirmişdir. O 70-dən artıq şeir kitabının, 2 monoqrafiyanın, 11 elmi-publisist kitabın, 20 poemanın və yüzlərlə məqalənin müəllifidir. Dahi Azərbaycan şairi uzun çəkən xəstəlikdən sonra 13 fevral 2009-cu ildə Bakı şəhərində vəfat etmişdir.